• 

  Maxaad Ka Taqaan Tababare Shiikha

Barnaamijkii xiddigaha oo aan markasta kaga hadalno taariikhda ciyaareed ee ciyaartooydii hore, waxaan maanta idinkugu haynaa tababaraha xulka qaranka wiilasha kubadda kolleyga Cabdulqaadir X. Dahir oo loo yaqaano "Shiikha".

Waxaanu nasiib u yeelannay inaan tababare Shiikha kula kullanno magaalada Toronto, isagoo ka soo qeygbgalay tartankii todobaadka Soomaalida ee Toronto 2010.

 Taariikhda sport ee Shiiha halkan laguma soo koobi karo, balse waxaan isku dayi doonaan inaan u soo gaabino sida tan:

Taariikh Kooban:

C/Qaadir Xaaji Daahir “Shiikha” waxa uu ku dhashay magaalada Mogadishu sanadku markuu ahaa 1963 kii waxa uuna waxbarashadiisa  ilaa iyo dugsiga sare uu  ku soo dhamaystay isla magaaladaasi Mogadishu asagoo ka deganaa degmada C/Casiis ama Kaambo taasoo ay ku noolaayeen tiro aad u badan oo ka mid ah taageerayaashii kubadda kolayga Soomaaliyeed.

C/Qaadir Xaaji Daahir (Shiikha), ayaa daawadayaal faro badan oo kubadda koleyga Soomaaliyeed ay isku raacsan yihiin inuu ahaa Mucjisadii kubadda koleyga Soomaaliyeed , waxaana uu ahaa ciyaaryahan aad u xirfad badan oo si la yaab leh uga dhex muuqday garoomada Kubadda koleyga. In kasta oo uu ahaa nin aad u dhuuban, una caato badan, haddana waxaa uu si wayn kubadda ula qaybsan jiray rag aad uga dhaadheer, uguna xoog badan.Xirfaddiisa sida aadka ah u heer sarreysay waxaa  aad u jeclaa bahda kubadda koleyga oo iyagu uu ku maqsuudin jiray fagaarayaasha lagu cayaaro K/koleyga.

Waxaa kale oo aan ku sifayn karaa inuu shiikha ahaa shaqsi miisaankiisa dhinaca cayaaridda K/koleyga uu aad u heer sarreeyay lana jaanqaadi karay cayaaryahannada K/koleyga caanka ka ah ee dunida hadduu heli lahaa fursad uu kaga cayaaro dibadda,sidoo kalena waxaa uu aad ugu dadaalaa soo saaridda  iyo horumarinta  dhallinyarada soo koraysa.

Taariikhdiisii cayaareed oo kooban:

Tartankii Degmooyinka gobolka Banaadir: 1978 iyo 1979kii.

  Kooxda K/koleyga heerka 1aad ee naadiga Badda : 1979- 1990  
  
 Xulka Qaranka :  1983 – 1990

Guulaha  ay gaareen kooxdiisa Badda:

1979, 1982, 1985, 1989 kii Kaalinta koowaad  Koobka Jeneral Daa’ud Kooxda kubadda koleyga ee  “Badda”.

1980 iyo 1982 kaalinta koowaad ee horyaalka kubadda kolayga 

Guulihiisa Gaarka ahaa

1986 iyo 1988 kii cayaarayahankii ugu wanaagsanaa tartankii  ciyaaraha xidigaha kubadda kolayga, isaga oo ku guulaystay ciyaaryahankii ugu wanaagsanaa ee ka cayaara baalka (Forward),waxaa kale oo uu ku guulaystay gabi ahaanba  tartanka tuurashada dheer ee saddexda dhibcood. (3 points).

Dalalka uu cayaaraha u tagay waxaa ay kala ahaayeen: Kenya 5 jeer, Ethiopia, Urdun, Kuwait, iyo Marooko.

Kooxihii Caalamiga ahaa ee uu la ciyaaray waxaa ay kala ahaayeen:

Jordan, Yamenta Cadmeed, Yamanta Sanca, Tanzania, Ethiopia, Zimbaabwe,  Aljeeriya, Falastiin, Masar, Kuwait, U.A.E, Suuriya,Kenya, Marooko, Baxrayn, Ivory Coast, Mozambique, Nayjeeriya, Sacuudi Arabia,Lubnaan, iyo Muritaniya.

Sidoo kale waxaa kale oo uu cayaaryahanka ka qayb-galay   ciyaaro saaxiibtimo iyo kuwo heer qaran ah “friendly match’ oo kooxdiisa Badda iyo xulka qarankuba ay la ciyaareen kooxo ka socday Africa iyo Maraykanka.

Waxaa iyaduna xusid mudan in cayaaryahanku uu kala qayb-galay  kooxaha Jeenyo iyo Muqdisho cayaaro caalami oo ay ka qayb-galeen isagoo ciyaaryahan  Shiikha  uu dhinaca kalena ka mid ahaa tababarayaashii kooxda naadiga badda heerka 1aad  ee gabdhaha iyo wiilasha iyo waliba tababareyaashii degmada Cabdicasiis, waxaana uu soo saaray ciyaaryahanno magac iyo  maamuus ku yeeshay kubadda koleyga Soomaaliyeed.
 
2008kii ayaa tababare shiikha loo magacaabay tababaraha xulka qaranka Soomaaliyeed ee wiilasha k/koleyga, waxaana u rajaynaynaa in xilkaasi loo magacaabay Alle u fududeeyo, guulona u soo hooyo qaranka Soomaaliyeed.

Shiikha waxa uu dalkii hooyo ka soo tagay 1990 kii wuxuuna hadda ku noolyahay Gobolka Minnesota  ee dalka Maraykanka halkaas oo uu tababar kubada kolayga ah ku siiyo dhalinyaro Soomaaliyeed oo aad u faro badan kuwaasi oo uu ka caawiyo xirfadda  barashada aasaaska kubadda koleyga. (Fundamentals Basic of Basketball). 

W/D Mohamed Busuri
mbusuri@xiddigaha.ca

Voice over Internet Protocol (VoIP), is a technology that allows you to make telephone calls using a broadband Internet connection instead of a regular (or analog) phone line